Песні з экспедыцыі “Докшыцы-2012”

Перад вамі запісы, зробленыя падчас экспедыцыі “Студэнцкага этнаграфічнага таварыства” у Докшыцкі раён Віцебская вобласці ў жніўні 2012 года. Удзельнікі экспедыцыі даследавалі большую частку Докшыцкага раёна, а таксама памежныя вёскі Вілейскага, Лагойскага і Мядзельскага раёнаў.

У складанку трапілі далёка не ўсе запісаныя песні. Прадстаўленае падалося найбольш паказальным і цікавым. Хацелася пазнаёміць слухача з прыгажосцю мясцовай спеўнай манеры, характэрнымі для рэгіёну ўзорамі абрадавых спеваў, хараством галасоў асобных спявачак. Амаль усе гераіні складанкі нарадзіліся ў 1920-1930-х гадах і ўсё жыццё пражылі на адным месцы. Нягледзячы на паважаны ўзрост, гэтыя жанчыны спяваюць па-майстэрску і з задавальненнем. Слухаючы іх сёння, разумееш, што перад намі апошняе пакаленне спявачак, для якія тутэйшая манера спеву і рэпертуар з’яўляюцца натуральнай часткай жыцця.

Гэтыя запісы не проста выдатныя ўзоры рэгіянальнага спеву. Яны з’яўляюцца своеасаблівым дакументам эпохі, які раскажа ўважліваму слухачу пра складаныя гістарычныя працэсы, што адбываліся на гэтых землях у 20 стагоддзі: падзел Беларусі на Заходняю і Ўсходняю, войны, асаблівасці суіснавання моў, рэлігій і культур.

Адным з галоўных натхняльнікаў і рухавікоў экспедыцыі быў Аляксей Лужынскі (Якуб Волат). Гэта была яго першая экспедыцыя СЭТ. Падчас выправы ён з асаблівай радасцю даследаваў свой родны Вілейскі раён. Дзякуючы Якубу мы маем шчасце слухаць многіх выдатных спявачак.