“Ай калядачкі, вы на дуб на дуб” – завяршэнне калядных святаў
21 студзеня Дзяржаўны музей гісторыі беларускай літаратуры і “Студэнцкае этнаграфічнае таварыства” правялі сумесную святочную імпрэзу, прымеркаваную да абрада ўсцягванне Каляды на дуб.
У беларусаў святы народнага календара часта не толькі сустракаюць, але і праважаюць. Цягнуць Каляду на дуба – лакальны абрад, зафіксаваны на памежжы Мінскай і Магілёўскай абласцей. Ён завяршае вялікі перыяд калядных святаў.
У праграме мерапрыемства была лекцыя Аляксея Глушко, прысвечаная абраду ўсцягвання Каляды на дуб. Падчас яе можна было даведацца пра змест і значэнні абрада, а таксама пачуць шмат цікавых этнаграфічных звестак, зафіксаваных СЭТ падчас экспедыцыі ў Клічаўскі раён Магілёўскай вобласці ў 2011 годзе.
Другой часткай імпрэзы была музычная праграма: калядныя песні з розных рэгіёнаў Беларусі ў выкананні спявачак, якія займаюцца пры СЭТ і народная інструментальная музыка і танцы ад Капэлі Алены Мялешкі, а таксама праекта VolArt.
Запрашаем паглядзець, як тое было!
За відэа асобная падзяка Арцёму Петрашкевічу!